Unu Gacor ini hari mata merah sa di pangkalan. Pengaru tadi malam minum tua nakaf insana sampe pagi karena duduk deng kawan yang mau wisuda. Belom acara, dia su parah duluan.
“Sa pung unu satu orang ini hari dia di mana e. Padahal kemarin kem dua baru sam-sama di dia pung adik nona pung kos untuk persiapan wisuda ini hari,” Unu Gacor cari dia pung teman, Unu Gaul.
Unu Gaul ni orang enak. Dia paling tenang su. Ti sibuk memang ke Unu Gacor kalo su mabok parah. Biar Unu Gacor suka marah-marah dan suka baganggu, tapi dia akan tetap tenang dan tanggapi dengan enak.
“Hoe Unu.. A kom su karmaaaana ini. Pagi-pagi mata su merah ni. Jangan minum tearlalu banyak. Kalau kom sakit, kermana. Sa ini hari dapat penumpang ojek banyak jadi tida ada di pangkalan. Sa baru pulang antar penumpang dari Kupang,”
Unu Gaul omong begitu, langsung angka kasi Unu Gacor rokok saliti dua bungkus. Mata terang memang na. Unu Gaul memang orang enak te.
“Nanentooom.. Hae kawan, A rokok saliti dua bungkus nan..? Memang kamu ini orang enak betul. Mulai ini hari biar sa panggil kom pu nama Om Endoz sa,” Unu Gacor omong begitu langsung tarek saliti satu batang.
Mulai dari saat itu, Unu Gaul pu nama resmi ganti nama Om Endoz. Ko dia pung parte dari masi kici yang minta ganti nama na. Satu kaki dari SD sampe sekarang. Tiap hari di pangkalan Unu Gaul pasti panggil Om Endoz. Unu Gaul ikot sa. Yang penting Unu Gacor bahagia. (Aprilia Eunike)
